`Meubungoeng Jiwa `

Alhamdulillah pujoe ka Allah

yang brei ma'unah ka kamoe hamba

geubrei ngon taufiq serta hidayah

geubrei ngon langkah kenoe meuteuka

seulaweut saleum kamoe sampaikan

ka rasul alam yg that mulia

ta tueng amanah yg ka geupeusan

pusaka indah di dalam donya.

Wajeb geutanyoe yang tem meu iman

Jaga peuneusan rasul mulia

walau that jioh kadang hana ban

beuna usaha dijih ta mita

teuma uroe nyoe hate that seunang

mandum atra nyan ka geusedia

geubrei ngon gurei yg jeut tauladan

ilme bak gob nyan ta tueng lam dada

wahei abi yang that jroh rupa

lisan droeneuh nyan jeut ka peunawa

Allah brei berkah lam ilme gata

cukop that indah sang bungong syurga

 

ta,zhem dikamoe ka droen ya gurei

peumiyup ulee seumah bak teu ot

neubrei ka kamoe mubagoe ilme

meuah meu lake jan jan han patot

seumoga gurei droeneuh neu ridha

peu nyang ka neuplei lam hate kamoe

harap bak berkat ilme nyang na

ngon hate ikhlas kamoe meurunoe

sidroe ulama muda rupawan

yang brei peuneurang lam hate kamoe

umpama lampu peungeuh trang bendrang

meunan tamsilan lon peugah kada

umpama panyoet dalam seupot klam 

umpama bintang oh malam jula

umpama uroe peungeuh kon wayang

meunan keuh rakan lon boh umpama

lagei ka geubrei kamoe ma,unah

bak jalan Allah jalla waazza

lageu geu sipreuk lam hate ummah

meubagoe hikmah teuka lam dada

wahei gure yang that lon gaseh

ileme di gata yang kamoe ikot

hate teumakot teu ot sang habeh

wate meucukeh bak buet han patot

wahee e gurei nyang that lon harap

lisan digata indah meusalop

ingat peuneusan yang ka meuadab

lam jeut jeut saat kamoe neu balot

ya Allah neubrei beu berkat umue

bak ek meusyehue ileme gob nyan

neubrei ngon tentram seureta makmue

neubrei derajat martabat manyang

Ya Allah neubrei dengon berekat

ileme gurei nyang that lon sayang

beujet keuh kamoe ureung meuadab

ikot buet nabi janjongan Alam

Created by. Raja Muda  Aw

Untuk Download Artikel Klik Gambar