Raja Muda Aw

NAZAM ILMU TAUHID AMAL
UNTUK MENGELUARKAN SYIRIK DALAM AMALAN ADAPUN TAUHID I’KTIKAD 50 / 60 UNTUK MENGELUARKAN SYIRIK DALAM HATI DI NAZAM OLEH TGK M. ADAM HASAN, SAMPOYNIET, ACEH UTARA ALUMNI DAYAH MESJID RAYA SAMALANGA DAN DAYAH AL-MADINATUL DINIYAH BLANG BLADEH (BIREUEN) KUTIPAN DARI KITAB HIKAM KARANGAN = IBNU ATHAILLAH AL-ASKANDARI=
Alhamdulillah pujoe keu Tuhan Yang bri kurniya tentang Ma’rifah Seulaweut salam akan janjungan Rasul Pilihan dari Potallah
	Salah saboh tanda Mumat ‘amalan Kureung harapan watei na salah Oh watei ta’at geet peurasaan Disisi Tuhan meurumpok balah
Oh watei kaya hatee lam seunang Oh teuka gasien sabee lam sosah Karena hate kon mat bak Tuhan Sabab tan meufom tentang ma’rifah
	Ucap bak babah mumat bak Tuhan Hatee di dalam la-en jikisah Gohlom meusaboh hatee ngon lisan Mantoeng didalam I’ktikeut salah
Pandangan tasawuf ngon ketauhidan Hanjeut hai cut bang lagee nyan langkah Ureung ma’rifah kepada Tuhan Saban hai abang seunang dan sosah
	Manusia udeep na lhee bagian Nyang saboh macam deuh amai leumah Keu dua harap kurniya Tuhan Oh ni’mat datang geu syukur bagah
Sabab geurasa na meu amalan Harap limpahan ubak potallah Menyo lagee nyan wahai eu rakan Mantong lam badan seula-en Allah
	Bagou nyang keu Ihee mumat bak tuhan Kana bagian masa keu leupah Sabee seurah drou ka nibak Tuhan Hate lam seunang Peu bri potallah
Menyan keuh hamba tan mat ‘amalan Bahagia bak Tuhan geubri meunalah Sabab ka beutoei peusidrou Tuhan Tanna meubayang na-‘amaliyah
	Hatee that ridha keu qadar Tuhan Sabee lam seunang peu bri Patallah Hatee ji rasa keu sa Tuhan Peu nyang troh datang Alhamdulillah
Pangkai men-amal taturi Tuhan Ureung iseulam nyan fon geugagah Han geutueng amai-ka uleeh Tuhan Meutan I’tikeut tentang Ma’rifah
	Meurunou fikah keusah ‘amalan Taturi Tuhan tan geuboh batas Menyan keuh cara na ridha Tuhan Seulamat iman donya takeubah
Seubab ma’rifah neu bri lee Tuhan Kadang bak badan saket bri Allah Naladom geubri dalam sosahan Ladom ka hilang aneuk meutuah
	Geupeunget rumoh ke hamba Tuhan Nyang na meu iman akan potallah Keu ubong rumoh udeep gundahan Meularat pageue neubri lee Allah
Untuk jeut buka pageue yang meunan Saba yue Tuhan gata geupeugah Allah neubantu ureung sabaran Di uroe dudou neu hisab bagah
	Tanda bahgia ureung meu-iman Sosah dan seunang Alhamdulillah Mameh dengan fheit lam penghidupan Tanda tan keukai neubri lee Allah
Cari raseuki neubri lee Tuhan Tapi bek tingai peurintah Allah Su-ai raseuki kana jaminan Meunan hai rakan peuneugah Allah
	Bek that-that sunggoh wahee e-rakan Peurentah tuhan sampou takeubah Meunyoe terjadi cara lagei nyan Hatee meu-iman neutop lee Allah
Meunyo kageutop hate meu-iman Takot hai rakan hana geupeuhah Oh watei mate neubri lee Tuhan Suil khatimah kadang bri Allah
	Meunyo oh mate hana le iman Keukai jahannam neubri lee Allah Neumou neu ba-e beu keukai iman Jok droe hai rakan ubak potallah
Neu harap ridha ka nibak Tuban Beu jroh seuneu-lheuh neubri lee Allah Husnul Khatimah di penghabisan Seunang hai rakan disisi Allah
	Beuna ma’rifah bak permulaan Nyan keuh hai taulan lakei bak Allah Bak akhee umu beumantong iman Harap bak tuhan kaom meutuah
Uleeh sebab nyan wahee hai rakan Taubat beurijang menyoe na salah Allah geutanyou taufur tahman Bandum neusayang taubat bak salah
	Watei ta taubat hai hamba Tuhan Yoh goh troh jawoeng ubak ghargharah Yoh mata urou mantong lagei nyan Taubat beurijang pat pat nasalah
Meuka di barat teuka urou nyan Pinto tataubat neutop lee Allah Meunan cit teungku sangat lon peusan Meuka trok jawoeng ubak ghargharah
	Meutan tataubat bak keusalahan Tamou hai rakan ie mata darah Yoh goh tatamong nuraka Tuhan Tamoe watei nyan cukop that teulah
E-ya Tuhan ku khaliqul ‘alam Neubri e Tuhan kamoe bek teulah Neubri kurniya keu kamou rijang Gata hai Tuhan kuasa leupah
	Kamou tan daya ngon keusanggupan Meulainkan Tuhan sidrou yang gagah Sou yang geu kheundak lam keumeunangan Kuasa Tuhan hana sou bantah
Uleeh seubab nyan wahe e-rakan Jok drou bak Tuhan jinou beu bagah Ngoen puteh hate dalam tauhidan Bek na meubayang seulain Allah
	Lailahaillallah Ucap bak babah yoh na kuasa Meunyo han ek lee takheun ngon lidah Ingat meutuah didalam dada
Meunyo lagei nyan sikap hai rakan Mudah-mudahan rahmat bak Allah Akan bahagia disisi Tuhan Watei geutanyou tawou bak Allah
	Wahee kawom lon dum seukalian Lakee bak tuhan ngon paleut dua blah Sa’at meudo’a wahe ya rakan Sagai bek leumah na amaliah
Tanda geutanyou harap bak Tuhan Yang la-en rakan makhluk Allah Tapi, neuqabul yang khendak Tuhan Meukon hai cut bang heuet hamba Allah
	Uleh seubab nyan wahai dum insan Do’a hai rakan teurimong Allah Cara teurimong na lhee bahgian Yang saboh macam langsoung geubalah
Cara keu dua gantou lee Tuhan Ta lakei seunang neubri lam sosah Teuma nyang keu lhee wahei e-rakan Diurou dudou neubri meu nalah
	Meukon lagee nyan I’ktikeut rakan Salah pandangan dalam ma’krifah Teukeudi tuhan kana azalan Hana meutuka keuhendak Allah
Wajib I’ktikeut cara lagei nyan Soal usaha syari’at Allah Hukum syari’at aturan Tuhan Hukum I’ktikeut peusidrou Allah
	Bek salah-salah wahee e rakan Dalam tauhidan kepada Allah Itulah kunci ureung iseulam Seulamat iman dalam makrifah
Naladom ureung geubri lee Tuhan Ibadat seunang kepada Allah Tapi usaha gob nyan sapeu tan Lam penghidupan tan aloh-alah
	Nyan keuh hai teungku kadar bak Tuhan Pangkat tajridan neubri lee Allah Bek lee neu ubah kadar lagei nyan Neuseu-on rakan yang bri potallah
Tanda bahagia neubri lee Tuhan Seubab neusayang uleh potallah Menyoe cit neujak-.jak cari makan Ka neutron rakan bak tempat rendàh
	Saboh macam treuk neubri lee Tuhan Jaya usaha teukeudi Allah Sebab raseuki na pencarian Peurintah Tuhan hantom geukeubah
Meunyan keuh ureung wahe e taulan Pangkat asbaban neujok lee Allah Meunyou peuget heut tok sembah Tuhan Hingga usaha bandum ta keubah
	Geu-anggap napsu teusom lam badan Jisah lee syetan mangat ta ubah Meunyo ta ubah pangkat bak Tuhan Oh dudou rakan pasti lam teulah
Karena tan ridha teukeudi Tuhan Sabab tan dalam tentang ma’rifah Diureung awam bandum lagei nyan Anggap usaha yang bri fa-edah
	Beu yakin that-that wahe e rakan Tentang meu-iman kepada Allah Beuthat get sungguh perencanaan Han-ek jireuloh yang ka-iradah
Peuget usaha lam penghidupan Kon taneuk ubah kadla yang sudah Tentang usaha dan ikhtiaran Ikut suruhan dari potallah
	Yang ka teukkeudi ka nibak Tuhan Tetap berjalan han eek ta-ilah Wajib. percaya cara lageinyan Ureung meuiman kepada Allah
Uleeh seubab nyan wahee e rakan Jok drou bak Tuhan bekna meu-ilah Beuseunang hate kepada tuhan Pue nyang teukeudi dari potallah
	Meunyou hai kawom cara lagei nyan Seulamat iman gata meutuah Meunan geutuntut lam ketauhidan Dan peradaban kepada Allah
Oh nou keuh siat haba peuneusan Hak ulon tuan yang hina leupah Harap peu meu’ah jika salahan Di ulon tuan peujok bak Allah
	Beujeut keu-amai keu ulon tuan Ulon meunazam peutunjok Allah Keu ma dan ku lon yang ka bak Tuhan Dan sekalian Gurei lon yang sah
Beuluwah kubu dum sekalian Seureuta insan beena karabah Beujioh bala ureung meu-iman Neubri beutentram wahe ya allah
	Bandum geutanyou neubri beu aman Neubri beu tentram wahee potallah Beuroh dum kamou lam ridha Tuhan Neubri ampunan meunyo na salah
Oh nou keuh lontop tauhid lam nazam Meu’ah hai rakan meunyo nasalah Kadang meutajo teukeudi Tuhan Ampon ya rahman lon hambá Allah
Wassalam TGK. M. ADAM HASAN By. Raja Muda Aw

Untuk Download Artikel Klik Gambar